زراعه الكلى بالفلبين

حبيت أضيف جميع المعلومات اللي حصلت عليها من خلال زيارتي للفلبين لإجراء عملية زراعة كلى لوالدي

الحقيقه ما أدري من وين أبدى لكن ابتطرق للأمور المهمه في البدايه وبعدها ابضيف الأمور العاديه وأتمنى لأي واحد مقبل على السفر للفلبين لزراعة الكلى أن الله يوفقه ويعافيه ويسمح أموره

البدايه الفلبين دوله تمشي بالفلوس
يعني البخشيش لازم منه والا ما تمشي امورك في كل مكان حتى الشرطه هم اول من يطمع فيك يعني لابد تكون فاهم اللعبه هذي
اللي يبي يسافر للفلبين لازم يكون معه لغه انقليزيه والا بيتبهذل كل التعاملات هناك باللغه الانقليزيه في المطار وفي المستشفى وفي المطاعم والتكاسي وكل شئ واللي ما معه لغه يحاول يتعلم بعض الكلمات الاساسيه على شان يقدر يمشي حاله هناك
اللي يبي يسافر للفلبين ياخذ حسابه ان البلد غاليه المصاريف فيها نفس المصاريف عندنا بالرياض وأحيانا أغلى يعني لازم يكون متجهز بشكل كامل من الناحيه الماديه
اللي يبي يسافر للفلبين لابد ياخذ معاه عزبه كامله للطبخ وخاصة الرز والبهارات بالاضافه الى القهوه والهيل وباقي الاغراض
ما يحتاج الواحد يطلع فيزه للفلبين اذا جيت للمطار بالفلبين يسئلونك كم يوم بتجلس قول لهم 21 يوم لان واحد وعشرين يوم ما عليها شئ ولو زادت المده وانت بالفلبين تدفع ضريبه ما تكلفك 160 ريال سعودي أو تعطي الموظف شئ يسكته وتمشي امورك
العمله الفلبينيه هي البيسو وسعر صرفه مع الريال السعودي ماهو ثابت ولا مع الدولار يعني مره يرتفع ومره ينخفض بس اغلب شئ الريال السعودي يساوي 11 بيسو والدولار يساوي 40 الى 41 كل يوم للصرف سعر
اول ما تروح للفلبين لازم تطلع لك شريحه فلبينيه وعندهم شركتين للجوال وحده اسمها قلوب ولاهي زينه وما تتصل والثانيه اسمها سمارت وهذي افضل شئ ارسالها زين والمكالمات الدوليه واضح الصوت فيها وسعر الدقيقه للسعوديه تقريبا ريالين والرسائل تقريبا ريال
أي واحد بيسافر للفلبين لاياخذ معه جهاز جوال غالي لانها تنسرق على طول هناك اول ما يحطون النظر عليه الجوال . لازم الواحد ياخذ معه جوال عادي فيصليه والا دلوعه جوال رخيص وزين وياليت الواحد ياخذ معه لاب توب لان هناك الاجهزه انقليزيه والواحد لازم له جهاز عربي ويقدر يتواصل مع اهله ومع اللي يبي
الجو بالفلبين يميل للحراره وفي الليل الجو رهيب يعني الواحد ياخذ معه ملابس صيفيه واهم حاجه لا ياخذ معه ثياب لانهم يطمعون في الخليجي لازم الواحد يلبس مثل لبسهم ويفتك من شر الحراميه والطماعين
المستشفيات الفلبين فيه مستشفيات واجد وتختلف بعضها عن بعض

مستشفى سنت لوكس

يعتبر افخم وأرقى مستشفى بالفلبين ويتميز بالفخامه والترتيب ويوجد فيه سويتات مكونه من غرفتين ومجهزه بأجهزة حاسب آلي وانترنت ويقدر المرافق يسكن مع المريض في نفس السويت يعني ما يحتاج يستأجر له فندق هذا اذا كان المريض والمرافق ما يبون خساير ولا يبون زيادة مصاريف مع العلم ان اللي يبي يسك برا المستشفى عادي يقدر بس ما فيه فنادق قريبه مره منه يعني يبي لها شوي والمنطقه اللي فيها المستشفى ما فيها اسواق او حركه يعني اللي موحشه تقريبا اسمها منطقة كازن ستي المستشفى هذا يوجد فيه الدكتوره/ روز وهي نائبة رئيس جمعية الكلى بالفلبين دكتوره ناجحه ومتخصصه في الأطفال والنساء بس ما يمنع انها تسوي للرجال عيبها الوحيد انها تحب الفلوس والتأخر في الرد على قبول الحالات المبلغ اللي تاخذه هذي الدكتوره ماهو ثابت ابد تقول كل حاله لها سعر وكذا الواحد يكون محتار احيانا تتفق معها على سعر وبعدين تقول لك حصلت مضاعفات او التهابات وزاد السعر وسبق انها منعت ناس سعوديين من السفر وفاتتهم الرحلات على شان مبالغ تترازح بين 200 الى 400 ريال سعودي على شان كذا قلت عنها انها تحب الفلوس بس اغلب الحالت (60000) ستين الف دولار ما تنزل عنها ابد وتطلع معك بالسعر فوق اذا كان المريض كبير في السن وعنده سكر وضغط الى (75000) خمسه وسبعين الف دولار في الحدود هذي لكن من ناحيه طبيه تعتبر جراحه ماهره وما عليها كلام جوال الدكتوره روز (00639163184087) وتلفون المستشفى (006327230101)

مستشفى فيكتور (بولي ميدك)

هذا مستشفى عادي ما يقارن بمستشفى سنت لوكس وفيه سويتات وأجهزة حاسب آلي وانترنت والمستشفى هذا العرب متواجدين فيه بشكل مستمر وعلى مدار الاسبوع يستقبل المرضى والطبيب المعالج فيه هو الجراح إليكس وهو اللي سوى العمليه لأبوي والحمد لله ابوي الحين بصحه ممتازه عسى الله يعافي جميع مرضى المسلمين المستشفى هذا في منطقة مندليون قريبه من مكاتي وقريب من السفاره السعوديه كلها عشر دقايق بس الدكتور اليكس يسوي العمليات على ستين الف دولار. ما عنده هذا شايب والا هذا شباب السعر موحد عنده ومهما تجي للانسان مضاعفات او شئ ما ياخذ عليه زيادة فلوس يعني يكتفي بالاتفاق الاول ميزة الدكتور انه ما يهتم بالفلوس ولا يتأخر بالعمليات او يوقفها بسبب عدم الدفع حتى انه ياخذ الفلوس بدون ما يعدها لانه حسب كلامه يوثق بالمسلمين جوال الدكتور اليكس (00639175370366) فاكس الدكتور اليكس (006325324186) رقم مستشفى فيكتور (006325314911)

مستشفى جامعة الشرق الأقصى (f.e.u)

مستشفى عادي فيه غرف عاديه وطبعا ما فيه اجهزة حاسب او اتصال انترنت هذا قليل العرب فيه او يعتبر مهجور نوعاً ماص لكثر المشاكل اللي تجي فيه بين الطبيب وبين الحكومه بالفلبين والمستشفى هذا بعيد مره وهو في اخر منطقة كازن ستي مكانه اللي هو فيه ماهو أمين وخاصة في الليل الدكتور اللي يعالج في هذا المستشفى اسمه كازنوفا كازنوفا جراح ماهر وما عليه كلام بس المشكله المستشفى اللي يسوي فيه ماهو مضبوط وسمعنا اخبار ان الطاقم حقه الاول تغير عيب الدكتور كازنوفا انه يحب الفلوس بشكل فضيع لدرجة انه ما يسوي العمليه الا ياخذ ثلاث ارباع المبلغ وما عنده مشكله يرفض اجراء العمليه لين تجي الفلوس لانه داخل تجاره ما دخل طب وعلى شان كذا الناس تركته في الايام الاخير وخصوصا ان له مشاكل مع السفاره السعويه المستشفى هذا ما حوله سكن قريب اقرب شئ فيه شقق سكنيه لازم تستأجر من 14 يوم وطالع اسمها شقق الكاميرون قردينال على طريق اسمه كامن ويل (جوال مدير الشقق) (00639176225218) وانا شخصيا ما انصح بالمستشفى هذا جوال الدكتور كازنوفا (00639178627505) وجوال السكرتيره شيري (00639209450640)

فيه مستشفى اسمه (u.r.e.m)

هذا المستشفى بصفه مختصره زباله اكرمكم الله الطبيب اللي يعالج فيه اسمه أمانتي طبيب ناجح وما عليه كلام بس العيب كله في المستشفى هذا وانا احذركم من المستشفى هذا لان فيه مريض حاولوا يسون له قسطره مع الرقبه وفشلت واخر شئ طردوه مع الباب ودمه يصب من رقبته ويوم حاول يطالبهم وياخذ تقرير عن المتسبب قالوا اصلا انت ما عالجت عندنا ولا نعرفك الدكتور امانتي لو يسويها في مستشفى غير هذا يكون تمام لانه هو اللي سوى عملية الشيخ زاي بن نهيان الله يرحمه والدكتور هذا ياخذ سعر ستين الف دولار جوال الدكتور امانتي (00639175250592)
هذي المستشفيات اللي تسوي الزراعه ومعترف فيها من قبل السفاره السعوديه مع العلم ان كل الأطباء اللي على قائمة الزراعه عندي اساميهم وارقام جوالتهم ما عدا طبيبين أي شئ تبونه عنهم بلوغوني وانا ارد عليكم

الحين نجي للسكن

ازين شئ الواحد يسكن في فندق او شقه يكون فيها مطبخ لان المطاعم هناك ما تنفع ابد تعتبر منطقة مكاتي امينه بشكل كبير لكن ما فيه مستشفيات قريبه منها الا مستشفى فيكتور

انا ابتكلم عن السكن القريب من مستشفى فيكتور بحكم اني سكنت هناك فيه شقق اسمه البراقون بلازا وشقق اسمها جي تاور البراقون هذي مقابله المستشفى بينها وبينه طريق سريع وفيها حراسات ومواقف سيارات وأمان بعد امان الله فيها الغرفه المكشوفه على المطبخ يسمونها استديوا قيمتها من 500 الى 650 دولار في الشهر وفيه غرفه وصاله جانبيه ومطبخ ذي قيمتها 800 دولار للشهر وفيه غرفتين وصاله جانبيه ومطبخ ودورتين مياه (تكرمون) قيمتها تبدا من 1650 الى 1800 دولار في الشهر طبعا كل شي في الشقق هذي بالشهر ما فيه بالاسبوع او اليوم بس تعتبر الشقق هذي ممتازه مره
فيه شقق على نفس شارع المستشفى ما يحتاج قطع الطريق بس انها تبعد حوالي 300 متر اسمها جي تاور تتكون من صاله ومبخ تحت وغرفتن فوق تطلع لها بدرج بس غرفها صغار مهيب زي البراقون بس تعتبر حلوه قيمة الشقه في الشهر تتراوح من 600 الى 800 دولار هذي ارخص من هذيك بس هذيك احسن عندي انا وكل واحد له وجهة نظر
نظام الاستئجار في البراقون وفي جي تاور تتفق مع ناس يجيبون لك اصاحب الغرف يعني مثل مكاتب العقار بس هم بدون مكاتب فيه واحد اسمه مستر فرير هذا يجيب لكم الشقق في البراقون وفي جي تاور
جوال مستر فرير (00639178991581) وجوال زوجته نفس الشغله اسمها مسز فرير (00639178586984) وجوال السكرتيره حقتهم اسمها مايا تراها حرمتن ضفره (00639178586811) انتم كلموا زوجته والا سكرتيرته تراهم جيدات
وفيه وحده ثانيه اسمها لوري هذي سكنيه وسنعه هذا رقم جوال لوري (00639277015250)
فيه فندق قريب اسمه نيوهرايزن على نفس الشارع ورى شقق جي تاوري للي يبمشي رجليه خمس دقايق بس ما فيه مطبخ الفندق حلو ونظيف ورخيص مره اجار الغرفه بفلوس السعوديه حوالي 170 ريال رقم تلفون الفندق (006325323021)
وفيه فندق على نفس شارع المستشفى بس بالاتجاه المعاكس للفنادق هذي مسافة خمس دقايق رجليه وميزة الفندق هذا فيه مطبخ وفيه غرفه وغرفتين وثلاث غرف بعد يعني نظام شقق بس اجاره غالي نوعاً ما يعي الغرفتين ومطبخ اجارها بفلوس السعويه 350 ريال سعودي لليوم الواحد لكن للاسف ارقام الفندق ضاعت مني واللي يبي يسكن فيه يبلغني وانا احاول ادبرها له